佘繕妡無緣獎牌
亞洲劍擊錦標賽今日（17日）於中國無錫開鑼，首日賽事先上演男子佩劍同女子重劍個人賽，女重「一姐」江旻譓驚險打入4強，穩奪獎牌；佘繕妡8強就以一劍飲恨，唔關獎牌抹膊頭。
港隊女子重劍由世界排名第一嘅江旻譓領銜，班拍佘繕妡、陳渭泠同連翊希爭標。Vivien上年第二度登上亞洲冠軍嘅寶座，而家力爭衛冕。
喺6人小組嘅佘繕妡同陳渭泠率先完成小組賽，「佘佘」錄到4勝1負；陳則贏得3場，其餘兩場以4:5飲恨。江旻譓與連翊希隨後完成小組，Vivien未能全勝，一場以3:5唔敵新加坡劍手；Coco就攞下3勝3負，4名港將全數躋身人篩賽。
江旻譓驚險闖4強
江旻譓以5勝1負列左7號種子，首圈輪空，將與泰國或者蒙古劍手嘅勝方爭入16強，佘繕妡同樣輪空。陳渭泠與連翊希分別就以15:3同15:2戰勝中台北同印度劍手，率先晉身32強。
江旻譓輕取泰國劍手後，16強與喺小組落敗過嘅新加坡劍手Koh Elle Meihui再見面，Vivien再冇鬆懈，並以15:5大勝對手，松躋身8強。江旻譓其後對中國嘅朱明葉，戰情同樣緊湊，戰畢3鋪之後打成9:9平手，最終Vivien「奉旨一劍」奠勝，順殺入4強。
佘繕妡8強一劍飲恨
畀部14號種子佘繕妡，以15:11力克烏茲別克對手後，16強硬撼擊敗隊友連翊希嘅韓國3號種子李慧仁，雙方激戰3鋪之後打成6:6平手，佘佘「奉旨一劍」奠勝，以7:6躋身8強。
佘繕妡與韓國崔仁晶爭入4強，佘佘末段力追至8:8，雙方要以「奉旨一劍」分勝負，惟未能再下一城，以8:9飲恨，與亞錦賽獎牌抹身而過。
延伸閱讀
